“Mossad” İlham Əliyevdən sitat paylaşdı - Foto

İsrailin milli kəşfiyyat orqanı “Mossad” Azərbaycan Prezidenti İlham Əliyevin Qəzza zolağında mümkün beynəlxalq missiyalarda ölkəmizin iştirakı ilə bağlı fikrini yayıb.

“Qafqazinfo” xəbər verir ki, dövlət başçısının sözləri “Mossad”ın “X” sosial şəbəkəsindəki hesabında paylaşılıb.

Paylaşımda dövlət başçısının Azərbaycanın xaricə, o cümlədən Qəzzaya qoşun göndərməyəcəyi və hər hansı beynəlxalq sülhməramlı qüvvələrin tərkibində iştirak etməyəcəyi ilə bağlı fikirləri yer alıb.

“Bakı Tramp administrasiyası ilə müzakirələrin aparıldığını təsdiqləyib, lakin aydın şəkildə bəyan edib: Hər hansı missiyada iştirak nəzərdə tutulmur”, - “Mossad”ın sosial şəbəkə hesabında Prezidentdən sitat gətirilib.

Bu şərhin Qəzza sülh planı ilə bağlı təklif edilən beynəlxalq sabitləşdirmə qüvvələri haqqında danışıqlar fonunda səsləndiyi qeyd olunub.

Xatırladaq ki, Prezident İlham Əliyev yanvarın 5-də yerli televiziya kanallarına müsahibəsində Qəzza zolağında mümkün beynəlxalq missiyalarda Azərbaycanın iştirak edib-etməyəcəyi ilə bağlı sualı da cavablandırmışdı.