2026-cı ilin mart ayında Azərbaycanda istehlak qiymətləri indeksi illik müqayisədə 5.6 faiz artıb.
Bu barədə Azərbaycan Mərkəzi Bankı məlumat yayıb.
Bildirilib ki, qiymətləri dövlət tərəfindən tənzimlənən, eləcə də mövsümi xarakter daşıyan məhsul və xidmətlər nəzərə alınmadan hesablanan baza inflyasiya mart ayında illik 5.5 faiz təşkil edib.
Mart ayında qida məhsulları, alkoqollu içkilər və tütün məmulatları üzrə illik inflyasiya 6.5 faiz olub.
Mərkəzi Bankın məlumatına görə, ərzaq qiymətlərinin ümumi inflyasiyaya töhfəsi dəyişməyərək 2.9 faiz bəndi səviyyəsində qalıb. Qida məhsulları arasında ən yüksək illik qiymət artımı süd və süd məhsullarında (10.5 faiz) və meyvələrdə (9.7 faiz) qeydə alınıb.
Qeyri-qida məhsullarının qiymətləri illik müqayisədə 3.7 faiz artıb. Bu kateqoriyada ən yüksək bahalaşma 36.6 faizlə zərgərlik məmulatlarında müşahidə olunub.
Xidmətlər üzrə illik inflyasiya 5.7 faiz təşkil edib. Ödənişli xidmətlər arasında ən çox bahalaşan xidmətlər mərkəzi isitmə (50 faiz), metro nəqliyyatı (20 faiz), hava nəqliyyatı (13.6 faiz) və təbii qaz təchizatı (5.3 faiz) olub.
Mart ayında istehlak səbətinə daxil olan 566 adda mal və xidmətdən 117-sinin qiyməti illik müqayisədə 4 faizdən çox artıb. Məhsul və xidmətlərin 7.1 faizinin qiymətində isə azalma qeydə alınıb.
Mərkəzi Bank qeyd edib ki, inflyasiyanın formalaşmasına həm qlobal, həm də daxili amillər təsir göstərib. Ticarət tərəfdaşlarında inflyasiya, kənd təsərrüfatı istehsalçı qiymətləri, dövlət və ev təsərrüfatlarının istehlakı qiymət artımını sürətləndirən əsas faktorlar olub.
.jpeg)
