Maduro bütün ölkə boyu hərbi təlim elan etdi

Venesuela Silahlı Qüvvələri və xalq ölkəni imperialist təhdidlərdən və təcavüzlərdən qorumağa hazırdır.

Bunu Nikolas Maduro Venesuela Hərbi Hava Qüvvələrinin 105-ci ildönümündəki çıxışında deyib: "Təhdidlər və təcavüz vətənlərini, torpaqlarını, dənizlərini, səmalarını, ruhlarını və tarixlərini qorumağa hazır olan xalqımızı qorxutmayacaq və ya təəccübləndirməyəcək".

Maduro bildirib ki, "17 həftədir ki, xarici imperialist qüvvələr Amerika ictimaiyyətinin belə inanmadığı yalan və absurd arqumentlərdən istifadə edərək Karib dənizi, Cənubi Amerika və Venesuelada sülhü pozmaq üçün daim təhdidlər edirlər". O iddia edib ki, psixoloji təzyiq və "əxlaqsız imperialist hücumları" "Venesuela xalqında vətənpərvərlik şüurunu və inanılmaz müqavimət gücünü oyadıb".

Venesuela lideri ölkə daxilində hərtərəfli müdafiə zonalarında keçirilən "Müstəqillik 200" hərbi təlimlərinin başlandığını elan edib .